مرض أديسون Addison's Disease
#من_اقوي_المقالات_اللي_نزلت واللي هتنزل💥
***(واول مره اقولك اقرأ البوست كامل وشيره )***
هتعرف بقولك كدا لايه في الاخر ، البوست متعوب عليه
📖 هنبدأ البوست بقصة وسيناريو بيتكرر كتير…
✍️👩🏻 ست عندها 35 سنة، جاية لك الطوارئ أو العيادة، بتشتكي وتقول:
🔹 من حوالي سنة علي طول تعبانة، وإرهاق وتكسير في جسمي.
🔹 دوخة أول ما أقوم أقف.
🔹 بقيس ضغطي دايمًا بلاقيه واطي.
🔹 باخد نفسي وأطلع على الصيدلية أو المستشفى كل شوية أعلق محاليل علشان الضغط يعلى، وباخد علاج نقط كده علشان يعلي الضغط في البيت.
🔹 وعلشان متقولش دي أنيميا يا دكتور... أنا عملت صورة دم CBC وطلع معنديش أنيميا.
🔹 وبرضه بحس إن لون الجلد بقى غامق عن الطبيعي، خصوصًا في منطقة الوجه، والفم من جوه.
🚸 بعد لما أسمع الشكوى دي... هقف أفكر مع نفسي شوية…
(ضغطي دايمًا واطي + دوخة وتعب + اسمرار وغمقان في الجلد).
🎯 ممكن يا حوده يكون ده المرض اللي اسمه مرض أديسون (Addison's disease).
✍️ يلا بقى نبدأ نعرف كل حاجة عن المرض… وأوعدك هتستمتع وهتطلع حافظ وفاهم. ❤️
⛔️ يعني إيه مرض أديسون؟
هو مرض بيحصل بسبب فشل الغدة الكظرية أو فوق الكلوية (Adrenal gland) في إنتاج هرموناتها.
⬅️ وسميت بفوق كلوية؟ علشان مكانها بيكون فوق الكُلى... مش محتاجة يعني. 😂
وأهم هرمونين بيقلوا هم:
1️⃣هرمون الكورتيزول
2️⃣هرمون الالدوستيرون
وأحيانًا يقل كمان إنتاج الأندروجينات.
⛔️ طب الكورتيزول والألدوستيرون دول بيعملوا إيه أصلًا علشان لما يقلوا في المرض ده أكون عارف إيه الأعراض اللي هتحصل؟
⬅️ الكورتيزول
● يحافظ على مستوى السكر.
● يساعد الجسم يتحمل التوتر والإجهاد.
● يحافظ على ضغط الدم.
⬅️ الألدوستيرون
● يحافظ على الصوديوم والمياه داخل الجسم، وبالتالي يحافظ على ضغط الدم.
● بيرمي البوتاسيوم في البول.
⛔️ إيه الأعراض اللي تخليني أفكر في مرض أديسون؟
أنا قلت معظمها فوق في القصة اللي بدأت بيها. ⬆️
⬅️ ولو مركز معايا هتعرف الأعراض من نفسك…
شوف الهرمونات اللي الغدة كانت بتفرزها، اللي هما الكورتيزول والألدوستيرون، وظيفتهم إيه... واعكس، هيطلعلك الأعراض.
☢️ المريض هيجيلك يشتكي من إيه؟
✅ ضغط واطي باستمرار،
✅ دوخة خاصة عند الوقوف.
✅ تعب وإرهاق شديد، وضعف عام... هتقولك “جسمي كله بيوجعني.”
✅ نقص سكر متكرر... على طول سكرها بيكون واطى.
✅ اسمرار الجلد بدون سبب واضح، واسمرار داخل الفم واللسان.
🚸 بيحصل الاسمرار ده بسبب إيه؟
بسبب زيادة في إفراز هرمون ACTH، اللي بيتفرز أصلًا من الغدة النخامية في المخ، ويروح للغدة الكظرية يقولها:
“إنتِ نايمة ليه؟ افرزي هرموناتك.” وطبعًا الغدة في المرض ده مش بتستجيب…
فيفضل ACTH يعلى... وهو اللي يعمل اسمرار الجلد والفم اللي قولنا عليهم.
⬅️ دي تعرفها إزاي؟ هقولك قصه علشان متنساش. 🤔
هتيجي تقولك: يا دكتور، كان فيه واحدة قريبتي جاية تزورنا، ومشوفناش بعض من سنة. علشان لو حد قريب منك ممكن ميلاحظش الفرق لأنه بيشوفك كل يوم. وأول لما شافتني قالتلي:
“وشك اسمر وغامق كده ليه عن آخر مرة؟” أكيد إنتِ هتزعلي وتفتكري إنها بتتريق. بس ممكن يكون كلامها صح.
أنا كدكتور هقولها:افتحي بوقك كده. ألاقي الفم من جوه غامق.
👈وحلو أوي لو عندها لسه جرح جديد... أبص عليه ألاقيه غامق في اللون عن أي جرح قديم.
✅ فقدان وزن، فقدان الشهية. غثيان وقي.
✅ ممكن تأثر على الحمل والخلفة، علشان كده لما ست عندها تأخر في الحمل ولغبه ف الدوره الشهريه.
اعمل تحليل هرمونات الغدة فوق الكظرية. بس مش روتين ف كل الحالات .
💡 الثلاثي اللي يخلي دماغك تنور وتشك في أديسون:
🔺 ضغط منخفض. 🔺 إرهاق شديد. 🔺 اسمرار الجلد.
⛔️ أسباب وأنواع مرض أديسون؟
1️⃣ أولي (Primary Addison) — وهو الأشهر.
يعني المشكلة في الغدة نفسها، هي اللي مش عارفة تفرز الهرمونات Primary Addison (80%)
إيه الأسباب اللي تعمل كده؟
أسباب كتير... مش مهم تعرفها كلها. لكن أشهر سبب هو:
✅ أمراض المناعة الذاتية (Autoimmune disease). وطالما حاجة مناعية... تبقى أكثر في الستات.
2️⃣ ثانوي (Secondary Addison)
يعني هنا الغدة الكظرية سليمة والمشكلة من فوق، في الغدة النخامية، مش بتفرز ACTH كفاية Secondary Addison (20%)
🎯 إنت مش مهم ليك تفرق أولي من ثانوي. الاتنين بييجوا بنفس الأعراض.
🧠بس الفرق البسيط اللي عاوزك تعرفه:
🎤 اسمرار وغمقان الجلد اللي قولنا عليه بيكون في النوع الاولي Primary Addison فقط علشان بيكون فيه ACTH عالي.
⛔️🩺 أشخصه إزاي؟
خلاص عرفت الأعراض وشكيت في المرض. عاوز أتأكد، هطلب تحاليل إيه؟
☑️ اعملي تحليل كورتيزول صباحي ومسائي... طبعًا هلاقيه منخفض.
☑️ اعمل تحليل الألدوستيرون... هلاقيه منخفض.
☑️ اعمل ACTH:
👈 عالي جدًا ➜ نوع أولي Primary Addison.
👈 منخفض ➜ النوع الثانوي، والمشكلة في الغدة النخامية Secondary Addison.
🧠 أهم اختبار للتأكيد؟ 🧪 Synacthen (ACTH Stimulation Test).
بنقيس الكورتيزول... ثم ندي ACTH صناعي.
✅ الطبيعي: الكورتيزول يعلى.
❌ في مرض أديسون: الكورتيزول لا يرتفع.
☑️ شوية تحاليل تساعدني: ■ الصوديوم ⬅️ قليل. ■ البوتاسيوم ⬅️ عالي. ■ السكر ⬅️ قليل.
☑️ أعمل بقى أشعات حسب السبب مثلاً:
📌 مقطعية على البطن.
📌 رنين أو مقطعية على الغدة النخامية.
وهكذا علشان أوصل للسبب.
⛔️ العلاج؟
👨🏻⚕️ المتابعة مع دكتور الباطنة والغدد الصماء. بس تعالى خدلك فكرة العلاج ببساطة …
✅ كل المشكلة إن الهرمونات زي الكورتيزول والألدوستيرون قليلين... فأديه الهرمونات دي من بره كتعويض.
✅️ وعالج السبب طبعا لو فيه مرض مناعي مصاحب اعالجه
