هنتكلم عن البواسير الخارجية، والشرخ الشرجي
#معلومه_طبية_رقم35
🎯تعالوا مع بعض النهارده .…
هنتكلم عن البواسير الخارجية، والشرخ الشرجي
🌷ومتخافش… في الآخر هديك الزتونة
اللي تعرف تفرق بين الأنواع التلاتة 😎
✍️ بسم الله نبدأ.…
🎯 1️⃣ البواسير الخارجية (التجمع الدموي حول الشرج)
Perianal Hematoma / External Piles
⛔️ تعريفها إيه؟من اسمها
البواسير :عبارة عن أوردة متمددة بسب الضغط تعمل تجمع دموي
وخارجية : يعني ظاهرة بره حول فتحة الشرج تحت الجلد
⬅️يعني التعريف على بعضه
هتلاقي كتلة دموية لونها أزرق تحت الجلد جنب فتحة الشرج
............…
⛔️ إيه هي الأسباب؟
غالبًا تحدث بسبب زيادة الضغط المفاجئ على الأوردة، زي:
✔️ الحزق الشديد أثناء التبرز. ✔️ الكحة الشديدة
✔️ حمل أشياء تقيلة. ✔️ الإمساك المستمر
.............…
⛔️ طيب إيه هي الأعراض؟
الأعراض تظهر فجأة 😣
تلاقي واحد مثلًا بيحزق علشان يشيل حاجة تقيلة،
مرة واحدة يحس..
✅️بألم شديد من تحت
✅️وكتلة دموية حول فتحة الشرج لونها أزرق
✅️والجلد فوقها بيكون مشدود
..................…
⛔️ العلاج؟
هفتح التجمع الدموي ده وأشيل البواسير ، مع جزء بسيط
من الجلد حواليها، وأسيب المكان مفتوح، هيلم لوحده🏌♀️
☠️ العيان طبعًا واخد مخدر موضعي علشان بتكون مؤلمة جدًا
................................................................................…
2️⃣ الشرخ الشرجي( Anal Fissure)
⛔️ إيه تعريفه؟
⬅️هو قرحة أو قطع طولي في فتحة الشرج
هوضحهالك شويه علشان تتخيل وبص علي الصوره ⬇️
كأنك عملت جرح بالطول في الخد من جوه او يكون عندك قرح كثير في الفم من جوه جنب بعض شوف بتكون مولمه ازي
............…
⛔️ الشرخ ده بيحصل فين في فتحة الشرج؟
عندك جدار خلفي اللي هو ناحيه الظهر وهو اللي ظاهر في الصوره اللي جايبهالك تحت علي الشمال ، وجدار أمامي..
⬅️ الشرخ بييجي …
✔️في الجدا الخلفي اكثر ( حوالي 90%) لسبيبن:
1️⃣ الدم اللي واصل له قليل
2️⃣ البراز الصلب لو الشخص عنده إمساك بينزل على الجدار الخلفي فيعمل جرح وهو نازل.
✔️ الجدار الامامي: 10%
..........…
⛔️ إيه أشهر الأسباب؟
1️⃣ إمساك شديد او براز صلب يعني بيحزق كتير
2️⃣ الحزق الشديد أثناء الولادة 💡معلومة زيادة * وده لو حصل شرخ هيكون في الجدار الامامي ليه علشان الحزق اثناء الولاده الطبيعي ، وراس البيبي بتضغط وهي نازله ع الجدار الامامي *
4️⃣ ممكن يحصل بعد عمليات بواسير غير سليمة
5️⃣ وممكن لو الدكتور بيستخدم أي أداة للفحص تعور
فتحة الشرج من جوه
6️⃣ ممكن يحصل بسبب أمراض زي مرض كرونز
Crohn's disease
........................…
⛔️ إيه الشكوى اللي هييجي بيها المريض؟
✅️أهم شكوى
✔️🔥 وجع ونار يا دكتور مع الحمام معناه غالبًا فيه شرخ،
والبراز لما بينزل علي الشرخ ده بيعمل الم جامد
والوجع يستمر بعد الحمام بفترة
✅️وتلاقي معاه:
✔️ نقط دم بعد الحمام. ✔️ أو البراز معرّق بالدم 🩸
✔️ومن كتر الوجع يقول والله ما داخل الحمام تاني فيجيله إمساك.. والامساك يعمل شرح تاني ووجع ولفي بينا يا دنيا …
💡 معلومة زيادة ليك ؟؟ طالما فيه إمساك ووجع من تحت،
ممكن مش في كل الاحوال ألاقي معاه:
✅️حرقان في البول. ✅️ ألم أثناء الدورة الشهرية
هتقولي إيه جاب ده لده؟
هقولك هو كده بييجوا مع بعض 👌Reflex
..........…
⛔️ التشخيص؟
المريض جاي بالأعراض اللي قولناها ⬆️
الدكتور هيفحص،
أول ما يبص هيلاقي فيه جرح طولي في الشرج
............…
⛔️وفيه نوعين من الشرخ ؟؟
1️⃣الشرخ الحاد
ده معناه لسه جديد ، الدكتور بيشوفه بالعين
وغالبًا لا يمكن لمسه بسبب الألم
2️⃣الشرخ المزمن
ده كان عنده شرخ وبياخد أدوية ويخف
ويرجع تاني يجيله إمساك أو غيره فيجيله رايح جاي
الدكتور بيشوفه وممكن يلمسه علشان مش بيوجع زي اللي فات
وتلاقي معاه حاجة مميزة 👇
✔️ وجود الزائدة الجلدية(Sentinel piles)
..........…
⛔️ العلاج؟
☢️الشرخ الحاد (علاج تحفظي) يعني بدون جراحه .
لسه الموضوع في الأول...…
🎯والهدف من العلاج أريح العضلات العاصرة لفتحة الشرج
علشان أقلل الألم والشرخ يلم
✔️ علاج الإمساك (ملينات )
✔️ أكل ألياف وخضار
✔️وسوائل وعصائر كثير
✔️ مرهم مخدر موضعي مثل الليدوكايين
✔️ حمام ماء دافئ بعد التبرز لمدة 15 دقيقة 🛁
☢️الشرخ المزمن. ( جراحي 👨⚕️)
لو الشرح مزمن ولسه في البديات
أعمل شق للعضلة العاصرة من الجنب عند الساعه 3
اسم العملية:Lateral Internal Sphincterotomy
⚠️وده العمليه الاشهر واللي بتتعمل دلوقتي.. والهدف منها 🤔
لما تقطع جزء من العضله العاصره بتفك الضغط شويه فيزود الدم اللي رايح فيساعد في التئام الشرخ وتقلل الالم.
واحد ناصح وفاهم اوي 🤗؟ممكن يقول لما اقطع العضله دي كدا مش هعرف اتحكم في البراز ، هقولك متخافش اللي هيعمل العمليه دكتور يعني عارف هو بيعمل ايه بالظبط..
فيه عمليه تانيه بس مش بتتعمل اوي (مش مهمه)
....................…
⛔️ الخلاصة والزتونة🌷
إزاي أفرق بين البواسير الداخلية والخارجية والشرخ؟
1️⃣ البواسير الداخلية
داخل القناة الشرجية , ومش مؤلمة ,ومعاه دم أحمر مع البراز 🩸
2️⃣ البواسير الخارجية
خارج فتحة الشرج ,مؤلمة جدًا ,عبارة عن ورم أزرق مؤلم 🔵
3️⃣ الشرخ الشرجي
جرح طولي بفتحة الشرج ,🔥 ألم شديد جدًا ,والبراز معرّق بالدم
........…
🎯 فهمت؟ تعال احفظ بقى🤗
✅️ دم بدون ألم → غالبًا بواسير داخلية
✅️ ورم أزرق مؤلم → بواسير خارجية
✅️ ألم نار بعد الحمام مع نقط دم → شرخ شرجي
💥كفايه بقي صدعت دماغنا ، اخر معلومه زياده 💡
مقدرش مقولهاش تنقذ الارواح ☠️ وهتدعيلي🤗
اي راجل او ست فوق 50 سنه عنده/ها نزيف شرجي⬅️ سرطان قولون حتي يثبت العكس حتي لو انت شايف البواسير او الشرخ بعينك لازم تعمل منظار تستبعد انه مفيش اورام القولون الاول💥
🫡معلش البوست طويل ومعلومات كثير ، انا بحب اقول المعلومه كامله ، بس هتفهمه ان شاء الله كنت ناوي نقسمه علي مرتين ، بس ورانا مواضيع كثير عاوز نتكلم فيها.
اتمني تكونوا استفدوا و لايك وشير علشان غيرك يستفاد💚
وباااي 👋
