اعراض الفتاق ومضاعفاته وتشخيصه وعلاجه

معلومه_طبيه_رقم59🔥

هنكمل النهارده موضوع الفتاق اللي بدأناه ، فمعلش 

قبل ما تبدأ تقرأ، ارجع خدلك بصّة على البوست 

#رقم_58 علشان تجمع الموضوع كله مع بعض،،

🤔عارف إنك مش هترجع ولا حاجة  فـ أنا هحاول

 أفكرك كده عالسريع بقصة الراجل اللي قابلته 

في الشارع وسمعته بيقول:

🎤عندي كلعوكه في بطني من تحت في منطقة 

خن الورك"(يقصد الفتق الأربي)، والبتاعة دي بتظهر أكتر

 لما أكح أو أحزق، وبتقل لما بنام وبرجعها بإيدي،

 فروحت كشفت، قال لي: فتاق، وعملت عملية…

بالقصة دي جمعتلك اللي هتكلم عليه دلوقتي بالتفصيل ⬇️

✍️ يلا يا معلم نبدأ مع بعض ...…

⛔️ إيه أعراض الفتاق؟

المريض هتلاقيه داخل عليك العيادة أو الطوارئ

 يشتكيلك من إيه؟

💥 أشهر  واهم عرض هيقولك ي دكتور 

☢️ فيه زي كيس أو كلعوكه أو بروز في بطني، غالبًا في مكان من الأماكن اللي قولنا عليها في البوست اللي فات، زي:

خن الورك، السرة، فوق السرة في المنتصف، أو على جرح مكان عملية…

ارجع لصورة البوست اللي فات 👀

☢️ والكلكوعه دي ليها مواصفات معينة؟؟

● تظهر أو تكبر مع الكحة.   ● تظهر مع الحزق.

● تظهر مع حمل الأشياء الثقيلة.

● تزيد مع الوقوف لفترة طويلة.

☢️ وممكن تختفي أو تصغر لما ينام، وأحيانًا ترجع البطن لوحدها.

لما الفتق يرجع البطن لوحده أو أنا أرجعه بإيدي، بسميه:

Reducible Hernia

فتق قابل للرد. فتق محترم وابن ناس .

💥 وممكن المريض يحس بإيه تاني مع الكلكوعه اللي ظاهرة دي؟؟

🔹 ألم أو وجع في مكان الفتق.

🔹 إحساس بالثقل أو الشد، يقولك: "فيه حاجة بتشد عليا".

🔹 الألم يزيد مع الكحة أو المجهود أو الحزق.

💥 وعلى حسب مكان الفتق، زي الفتق الأربي، لو وصل للخصية ممكن يعمل تورم في كيس الصفن.

طيب لحد دلوقتي يا حوده، الفتق محترم وابن ناس ولذيذ، الكلكوعه بتظهر وترجع والدنيا حلوة…

يا ريت كان الموضوع كده 

تعالى نعرف إمتى الفتق يكون خطر وحالة طوارئ ❌️⬇️

....................…

⛔️ إيه مضاعفات الخطر اللي ممكن تحصل للفتاق؟؟

مرتبهم لك من الأقل خطورة للأعلى خطورة 👇

1️⃣ الفتق القابل للرد(Reducible Hernia)

وده اللي اتكلمنا عنه فوق، الفتق المحترم ابن الناس اللي بيطلع ويدخل 

⬅️دي مش حالة طوارئ، دي حالة عيادة، نقعد ونتكلم ونشوف هنعمل إيه.

.....…

2️⃣ الفتق المحتبس غير قابل للرد(Irreducible Hernia)

هنا الفتق بيخرج، وتيجي ترجع محتويات الفتق زي الأمعاء بإيدك، مش بيرجع.

⬅️هنا تبدأ تخاف ومحتاج تروح للطوارئ علشان ممكن يتطور لحالة أخطر.

....…

3️⃣ الأمعاء اللي جوه الفتق تنسد

Obstructed Hernia

خلاص الفتق مش بيرجع، وكمان الأمعاء اتسدت فيه.

هيجي يشتكي بأعراض انسداد معوي زي:

🔸 ألم بالبطن. 🔸 ترجيع.

🔸 إمساك. 🔸 عدم خروج ريح أو براز.

ودي طبعًا حالة طوارئ 🚨

........…

4️⃣ الفتق المختنق ( Strangulated Hernia)

🚨وده أخطر سيناريو.

هنا مش بس الأمعاء اتحبست وعملت انسداد معوي، هنا كمان الدم اللي رايح للجزء ده اتقطع.

دي بقى حالة طوارئ طوارئ طوارئ 🚨🚨🚨

ويلزم التدخل الجراحي فورًا علشان أمنع مضاعفات كتير.

.............…

⛔️🔥 طيب يا حوده أفرق بينهم إزاي؟؟

أنا اتلغبطت 😵‍💫 فيه 4 أنواع من الفتاق:

1️⃣ فتق قابل للرد:

ده سهل، الفتق بترجعه بإيدك، بيرجع، والألم بسيط أو مفيش خالص.

2️⃣ 3️⃣ 4️⃣

تفرق إزاي بين الأنواع الثلاثة الباقيين؟

🟠 الفتق المحتبس غير قابل للرد؟

🟠 الفتق اللي معاه انسداد معوي؟

🟠 الفتق المختنق؟

كلهم طوارئ طبعًا، يعني محتاج تقييم كويس من

 دكتور جراحة عامة.

☢️بس أكتر واحد بخاف منه هو المختنق؟

هتلاقي واحد عنده فتاق، مرة واحدة حصل له:

● وجع جامد جدًا.    ●لون الفتق متغير.

 ●معاه ترجيع وانتفاخ.   ● ومش بيخرج ريح ولا براز.

🏥 لازم يتوجه للطوارئ فورًا.

🎤ده كده الجزء الأهم: الأعراض والمضاعفات اللي عاوزك تعرفها.

.....................…

**هكمل بس التشخيص والعلاج، حاجات بسيطة للمعرفة**

⛔️ نشخص الفتق إزاي؟

أغلب حالات الفتق يتم تشخيصها من خلال:

✅️ فحص الدكتور.

المريض هيقولك:عندي كلكوعه في بطني

طبعًا الطب مش بالسهولة دي 

كلكوعه أو كتلة دي ممكن تكون حاجة غير الفتاق طبعًا، اسمها:

Swelling For D.D

بس خلينا في اللي إحنا فيه…

الدكتور هيقوله: اطلع اكشف عليك

يشوف الفتق مكانه فين، وهل فيه مضاعفات ولا لا، وغيره.

✅️ وأوقات بيطلب منه، لو الفتق صغير لسه، يعمل سونار أو مقطعية.

✅️ وتحاليل بقى زي صورة دم وغيرها.

................…

⛔️ طيب نعالج الفتق إزاي؟

معلومة لازم تعرفها: الفتق مش هيختفي بالأدوية.

💥العلاج النهائي هو الجراحة…

سواء فتح أو منظار.

⬅️والجراحة ممكن تكون اختيارية، يعني روح وتعالى لما نكلمك، لو الفتق من غير مضاعفات.

⬅️وممكن تكون طوارئ وفتح حالًا لو حصلت مضاعفات

 والفتق بقى مختنق.

ولازم تقييم كويس من حبايبنا دكاترة الجراحة العامة 👨‍⚕️❤️

............…

⚠️إيه اللي بيحصل في العملية بشكل عام كده في الفتاق؟

■أفتح الكيس، أشوف محتويات الفتق قدامي.

■لو الأمعاء كويسة، وبقول أمعاء علشان في الغالب هي اللي بتكون جوه الفتق، لو كويسة أرجعها جوه البطن.

لو لونها غامق وحصل فيها اختناق، بشيل الجزء ده،

 وكلام تاني كبير علينا 

■وبعدين أحط شبكة علشان أقوي فتحة البطن.

 🎤وبكده نكون خلصنا موضوع كبير جدا وطويل حاولت اقوله ع مرتين ،وان شاء الله يكون سهل ،لايك وشير 💖

☢️اي حد عنده موضوع عاوز نتكلم فيه يبعتلي وباي 👋 

#اتعلم_الطب_مع_حوده 🩺