يعني إيه فتاق أو فتق أو عَرَق؟ Hernia

#معلومه_طبيه_رقم58 🔥

اقراء البوست واوعدك هتستفاد ولو معاك فلوس

 وعاوز تستسمر فلوسك افتحلك عياده مستني ايه 🤔💥

ولو قرات ومفهمتش قولي والله لادفعلك فلوس ..

وانا ماشي بفكر ومحتار 🤔يا ترى هعمل إيه؟

 القناة وصلت لألف متابع 1K 🎉وآخر بوست عدى 15 ألف مشاهدة 🔥 ، لازم أختار موضوع يكسر الدنيا 💥

للأسف مفيش في دماغي موضوع معين 🤷‍♂️

🎤فجأة لقيت راجل كبير في السن بيقول لواحد في الشارع:

"أنا كان عندي كيس أو كلكوعة في بطني من تحت، 

في منطقة خن الورك اللي هي عند مفصل الفخذ، 

بس بقول بالعامية اللي أنا سمعته 😂

والكلكوعة دي كانت بتظهر أكتر لما أكح أو أحزق، وكنت بعرف أدخلها بإيدي."

⬅️الراجل اللي كان بيسمعه قاله:وبعدين عملت إيه في 

الكيس ده؟

⚠️️قاله: روحت كشفت، والدكتور قالي ده فتاق ومحتاج عملية.

🎯أنا وقفت ثواني كده  ودماغي قالت: خلاص يا حوده 😎🔥

هنـتكلم عن الموضوع ده!

خدت نفسي وجريت 🏃‍♂️ ومسكت التليفون 📱

💥يلا بينا نبدأ مع بعض موضوع سمعنا اسمه كتير،

بس معلوماتك عنه قليلة 👀

النهارده هنعرف معظم التفاصيل عن الفتاق.

المقدمة الطويلة اللي فاتت دي مهمة،

أنا مش جاي أحكيلك قصة وأضيع وقتك 😂

ندخل في الموضوع بقى ⬇️

🎯 بسم الله نبدأ ❤️

⛔️ يعني إيه فتاق أو فتق أو عَرَق؟ Hernia

كلها أسماء لنفس الموضوع،بس طبعًا اللهجات مختلفة 😅

يعني ممكن المريض يقول للدكتور:"أنا عندي العَرَق."

وممكن الدكتور أول مرة يسمعها يستغرب 🤔😂

لأن إحنا كدكاترة الاسم المشهور عندنا هو الفتق أو الفتاق.

بس لازم تكون عارف إن المريض ممكن يستخدم أسماء مختلفة لنفس المشكلة.

⬅️⛔️ الفتق عبارة عن إيه؟

الفتق عبارة عن بروز أو كيس بيخرج من خلال نقطة ضعف أو فتحة في جدار البطن، وبيكون جواه جزء من الدهون أو جزء من الأمعاء، وغالبًا الأمعاء الدقيقة (Small intestine).

●الطبيعي إن عضلات جدار البطن تكون قوية وتحافظ على محتويات البطن في مكانها.

■لكن لما يحصل ضعف في جدار البطن، ومعاه أحيانًا زيادة في الضغط داخل البطن، ممكن جزء من الدهون أو الأمعاء يندفع ويخرج من خلال نقطة الضعف دي.

(وده اللي بنسميه الفتق.)

🥳 هبسطهالك أكتر علشان تتخيل معايا إيه هو الفتق 🫣

الكلكوعة أو البروز اللي بتشوفه بره البطن

 ب يتكون من 3 حاجات أساسية:

🔹 فتحة أو نقطة ضعف في جدار البطن (Defect)

🔹 كيس الفتق (Hernial Sac)

🔹 محتويات الفتق (Contents) زي الدهون أو جزء من الأمعاء.

☢️ تعالى ابسطهالك بطريقة بسيطة جدًا:

تخيل إنك جبت كيس، زي الكيس اللي بتحط فيه الفاكهة 🍎🍊

هات كيس فاضي وحط إيدك جواه.

👈 فتحة الفتق هنا هتكون زي فتحة الكيس.

👈 كيس الفتق هنا هيكون زي الكيس نفسه.

👈 محتويات الفتق هنا هتكون زي إيدك اللي جوه الكيس.

أعتقد مفيش أبسط من كده 😂❤️

قولتلك تعريف الفتق بـ3 طرق مختلفة،لو مش عاوز تفهم بقى هتفهم 😂😂

💥وبرده علشان تتخيل الموضوع أكتر،أنا هرسملك رسمة

 بإيدي تحت بص عليها ⬇️

...........................…

⛔️ إيه أسباب الفتق؟

الفتق غالبًا بيحصل نتيجة:

 ضعف في جدار البطن➕ زيادة الضغط داخل البطن

1️⃣ ضعف في جدار البطن

ممكن يحصل بسبب:

✅️ السمنة وزيادة الوزن

الأشخاص اللي عندهم زيادة في الوزن ممكن يكونوا أكثر عرضة للفتق، بسبب زيادة الضغط على جدار البطن، بالإضافة إلى ضعف بعض أنسجته.

✅️ الحمل المتكرر

الحمل والولادة المتكررة ممكن يسببوا ضعفًا وتمددًا في عضلات وجدار البطن.

✅️ العمليات الجراحية السابقة

الشخص اللي عمل عملية جراحية قبل كده في البطن، ممكن يحصل ضعف في مكان الجرح، وبالتالي يظهر فتق في مكان العملية، وده بنسميه الفتق الجراحي (Incisional Hernia).

2️⃣ زيادة الضغط داخل البطن ، زي إيه؟ 🤔

☑️ شخص بيشيل أوزان ثقيلة باستمرار، خصوصًا الناس اللي شغلها بيعتمد على الشيل والحط.

☑️ الكحة المزمنة.

☑️ الإمساك المزمن والحزق المستمر أثناء التبرز.

☑️ صعوبة التبول بسبب تضخم البروستاتا، لأن المريض بيضطر للحزق باستمرار أثناء التبول.

☑️ أي سبب يؤدي إلى زيادة حجم البطن أو الضغط داخلها، زي استسقاء البطن.

☑️ وبعض الحالات اللي يصاحبها تضخم في أعضاء البطن.

☢️ ممكن تحفظ معظم أسباب زيادة الضغط داخل البطن في جملة واحدة:  واحد بيحزق باستمرار 🤔

🎯 كل الأسباب اللي قولناها فوق دي تعتبر أسباب مكتسبة.

لكن ممكن الفتق يكون بسبب ضعف خلقي موجود من وقت الولادة، وبعد كده يظهر الفتق في مرحلة متقدمه من العمر.

.......................…

⛔️ أشهر أماكن الفتق؟

إيه الأماكن اللي متوقع تشوف فيها الفتق؟ 🤔

إحنا عرفنا إن الفتق غالبًا عبارة عن كيس أو بروز خارج من خلال نقطة ضعف في جدار البطن، وجواه دهون أو أمعاء.

لكن طبعًا أماكن حدوث الفتق بتختلف.

تعالى نعرف أشهر أنواع الفتق اللي لازم تكون عارفها 

🥳 قبل ما تقرأ الأنواع، بص على الصورة اللي تحت علشان تعرف المكان بالظبط، وبعدها ارجع اقرأ 👀❤️

1️⃣ الفتق الأربي (Inguinal Hernia)

🎯 أشهر وأكثر أنواع الفتق شيوعًا، وبيظهر أكثر في الرجال.

✅️ مكانه فين؟

بيظهر في منطقة الأربية (Groin)، بين أسفل البطن وأعلى الفخذ، يعني في منطقة خن الورك فوق مفصل الفخذ.

وينقسم إلى نوعين أساسيين:

🟢 فتق أربي غير مباشر (Indirect Inguinal Hernia)

🔵 فتق أربي مباشر (Direct Inguinal Hernia)

🤔 التفرقة بينهم ممكن تكون صعبة عليك شوية،

بس خد المعلومة السهلة دي:

لو لقيت الفتق نازل لحد كيس الصفن أو واصل للخصية، 

فده غالبًا بيكون فتق أربي غير مباشر.

ولو عاوز تعرف الفرق بينهم بالتفصيل من الناحية التشريحية،

اكتبلي في التعليقات وهقولهالك لوحدك

.......................…

2️⃣ الفتق الفخذي (Femoral Hernia)

👩‍🦰 بيظهر أكثر في النساء، وخصوصًا مع التقدم في العمر.

✅️ مكانه فين؟

بص على الصورة وهتعرف المكان بالظبط 👀

بيظهر أسفل الرباط الأربي (Inguinal Ligament)، في أعلى الفخذ، وبيمر من خلال القناة الفخذية (Femoral Canal).

🚨 وده من الأنواع اللي بنخاف منها، لأنه أكثر عرضة لحدوث الاختناق (Strangulation) مقارنة بالفتق الأربي.

.......................…

3️⃣ الفتق السُرّي (Umbilical Hernia)

✅️ مكانه فين؟

بيظهر في منطقة السرة أو حولها.

وبيكون أكثر شيوعًا في بعض الحالات، زي:

👩‍🦰 النساء اللي عندهم زيادة في الوزن.

🤰 النساء اللي حملوا وولدوا عدة مرات.

👶 وكمان شائع في الأطفال.

.......................…

4️⃣ الفتق فوق السرة (Epigastric Hernia)

✅️ مكانه فين؟

بيظهر في منتصف البطن،

في المنطقة بين أسفل عظمة الصدر والسرة.

.......................…

5️⃣ الفتق الجراحي (Incisional Hernia)

✅️ مكانه فين؟

من اسمه تقدر تعرفه 😎

الفتق ده بيظهر في مكان جرح عملية جراحية قديمة في البطن، بسبب ضعف جدار البطن في مكان الجرح.

.......................…

☢️ دي أشهر أماكن الفتق اللي ممكن تشوفها.

وطبعًا فيه أنواع وأماكن تانية أقل شيوعًا، ومش مشهورة أوي.

🎤 معلومة زيادة ليك؟ 😎

الفتق مش لازم يكون ظاهر قدامك على البطن!

فيه نوع من الفتق بيكون داخلي، ومن أشهر أمثلته فتق الحجاب الحاجز (Hiatal Hernia).

وده بيحصل لما جزء من المعدة يطلع من خلال فتحة في الحجاب الحاجز إلى داخل الصدر.

.......................…

🎯لسه موضوع الفتق مخلصش أنا عارف إن الموضوع طويل وصعب شوية،بس أنا بسطته على قد ما أقدر والله ❤️

⏳ انتظروني في البوست القادم.هنتكلم عن:

● أعراض الفتق.

● إزاي تعرف إن الكلكوعة دي ممكن تكون فتق؟

● إيه المضاعفات الخطيرة اللي ممكن تحصل؟

● إزاي نشخص الفتق؟  ●وهل كل فتق محتاج عملية؟

● وإيه العلاج النهائي للفتق؟

 كل ده هنعرفه بالتفصيل في البوست القادم.

 لايك وشير كتير علشان المعلومة توصل لأكبر عدد ممكن 🥳

#اتعلم_الطب_مع_حوده💖💝