هنتكلم عن عرق النسا (Sciatica
#معلومه_طبية_رقم42
🎶معقول إنساك معقول_ تنساني انا علي طول 🎶
ايه ده يا حوده؟ دي أغنية!
بالنسبالك مجرد أغنية؛ بس مع حوده أكيد فيه سر 😉
⬅️حد هيقولي:
"عندك حق يا محمود، البت سابتني وأنا مش قادر أنساها" 💔
أكيد إنت عارف هرد أقولك ايه:
اتنيل و اقعد 😅 دي هتنساها عادي، شوفلك بت غيرها💔
🎯إنما النهارده أنا جاي أتكلم عن ألم مستحيل صاحبه ينساه ،
ألم ووجع بيبدأ من الظهر، وينزل على الرجل من ورا كلها
كأن كهربا وتنميل .
🎯 هنتكلم عن عرق النسا (Sciatica) .
⬅️اسمه النَسا… مش النِساء
علشان حد هيشوف الاسم ويعمل نفسه ناصح ويقول:
"ده بيجي للستات بس" 🤓
لا يا فالح 😏 ، بيجي للرجالة كمان…
✔️وسبب تسميته “عرق النَسا”
إن الألم بتاعه صعب جدًا يتنسي وبينسي أي ألم تاني 🥺
⬅️ مع بعض النهارده نعرف أكتر عن الموضوع…
✍️ بسم الله نبدأ…
⛔ يعني ايه عرق النسا؟
ده عرض وليس مرض
بيحصل لما يحدث ضغط أو التهاب على (العصب الوركي)
⬅️والعصب ده خارج من أسفل الظهر وممتد نازل على
الفخد من الخلف والساق لحد القدم،
علشان كده تلاقي المريض بيقولك:
“الألم ماسك رجلي كلها من ورا”
🥳 معلومة زياده ليك:
عرق النسا يعتبر أكبر عصب في الجسم تقريبًا 🧠
.....................................…
⛔ الأعراض؟ المريض هيجي يشتكي من ايه؟ 🤔
طبعًا عارفين إن أي عصب في الجسم شايل
إحساس وحركة،فلما أضغط على العصب هيتأثر…
1️⃣ الأول الإحساس هيتأثر، والمريض هيشتكي من:
✅ ألم في أسفل الضهر نازل على رجل واحدة غالبًا
✅ حرقان أو كهربا او لسعه أو تنميل
في الرجل والساق والقدم
⬅️ الألم بيزيد مع:
المشي ، الكحة ، العطس ، الوقوف ، والجلوس لمده طويله
⬅️ وبيخف لما ينام على ضهره غالبًا…
2️⃣ وبعد شوية، في الحالات الشديدة بيأثر على الحركة، والمريض يشتكي من:
✅ ضعف في الرجل
✅ صعوبة في الحركة
................…
⛔️ايه أشهر الأسباب اللي تضغط على عرق النسا
وتعمل الأعراض اللي فوق؟ ⬆️
1️⃣ الانزلاق الغضروفي (وده أشهر سبب)
الغضروف يخرج من مكانه ويضغط على جذور العصب،
فالألم يسمع في الرجل كلها.
2️⃣ خشونة أو تآكل في الفقرات القطنية.
3️⃣ حمل أشياء ثقيلة بطريقة غلط 🏋️
ودي كتير جدًا…
حد نزل يشيل حاجة تقيلة من الأرض،
هب، مسك ضهره ومش قادر يتحرك 😵💫
4️⃣ الحوادث
زي حد عمل حادثة واتخبط في ضهره، فالفقرات ممكن يحصلها كسر وتضغط على العصب.
5️⃣ الإصابات
ودي إنت عرفتها ،واحد أخد حقنة عضل غلط لطشت العصب💉
🥳علشان كده خلي بالك لما تدي حقنة عضل،
خليك في الجزء العلوي الخارجي.
6️⃣ أحيانًا بسبب مرض السكر أو التهاب الأعصاب.
🎯وطبعًا أكتر سببين هما:
1️⃣ الانزلاق الغضروفي
2️⃣ خشونة وزحزحه الفقرات
...........................…
⛔ إزاي نشخصه؟
1️⃣التشخيص بيبدأ من وصف المريض للألم:
يا دكتور فيه كهربا نازلة على رجلي من ورا
والألم بيزيد مع الحركة زي ما قلنا.
2️⃣الدكتور ممكن يعمل اختبار(Straight Leg Raise test)
يساعد يشخص بيه،وهو إن المريض ينام على ضهره،
والدكتور يرفع رجله من على الأرض.
أول ما يوصل لدرجة معينة، المريض يقول:
خلاص مش قادر أرفع أكتر من كده .. (30 _70 )
3️⃣وطبعًا نحتاج نعمل:
✅ أشعة عادية X-Ray
✅ وأشعة رنين مغناطيسي MRI
وده اللي بيبين أكتر لو شاكين إن فيه غضروف ضاغط.
4️⃣ولو السبب مرض السكر، يبقى نعمل تحليل سكر.
🥳 معلومة زيادة ليك…
أنا ممكن لما المريض يجي يشتكيلي من وجع سواء
في إيده أو رجله،
قبل لما أطلب رنين مغناطيسي، انا بكون متوقع الغضروف
بين الفقرة الكام والفقرة الكام 😎
إزاي؟ لا دي صعبة عليك
........................…
⛔ العلاج؟
هنبدأ الأول بعلاج تحفظي ودوائي:
✅ الراحة
✅ مسكنات ونبدا بالمسكنات العاديه وممكن لو الوجع زي ما هو بناخد مسكنات مخصوصه لوجع الاعصاب ومضادات التهاب
✅ باسط عضلات
✅ علاج طبيعي وتمارين
✅️شد الفقرات
✅ تجنب حمل التقيل والانحناء الغلط
طيب ايه الانحناء الصح؟ 🤔
لو عاوز تجيب حاجة من على الأرض،
الطريقة الصح إنك تنزل على ركبتك الأول،ويكون ضهرك مفرود.
🚨 وفي حالات شديده لو فيه:
1️⃣ ضغط شديد على العصب
2️⃣ ضعف في الرجل ومش قادر يحركها
3️⃣ عدم التحكم في البول أو البراز
⬆️ده وقتها محتاج تقييم بسرعة،
وممكن يحتاج تدخل جراحي.
✅️وطبعًا موضوع العلاج هنا بيعتمد على كذا حاجة علي
تقيم حاله المريض والدكتور المعالج…
🔴طولت عليكم معلش
استنوا بوستات أكتر عن أسباب تانية لآلام الظهر 🔥
أتمنى تكونوا استفدتوا، والمعلومة مبسطه بالنسبالك ❤️
لايك كثير وشير 🔥👍
⏰️ نختم بسوال صعب ايه معني الرقمين دول (30_70)
الاجابه مش مذكوره صريحه في البوست ، بس لو حد شاطر وفكر هيجاوب ؟ االي يعرف يكتب ف التعليقات???
باااااي 👋
