متلازمة غيلان باريه ️ Guillain-Barré Syndrome (GBS)
معلومة_طبية_رقم60 🧠
#بوست_للعظماء_مخ_واعصاب وانت عارف الباقي أوعدك هتسمتع 💖
🚨 دخلوا بيه الطوارئ شايلينه على إيديهم…
بس الحكاية بدأت بتنميل بسيط في رجله! 😳
🔷️ هنبدأ موضوعنا بقصة…
الساعة 2.5 الفجر، دخل عليك وإنت قاعد في الطوارئ شاب عنده 40 سنة، أهله شايلينه ومش قادر يمشي ..
⬅️ بسأل أهله:خير حصل إيه؟
قالوا:
يا دكتور والله، من كام يوم رجليه كانت بتنمل شوية،
قولنا عادي ممكن شوية تعب أو قلة نوم، وبعدها بدأ يحس بثقل في رجله وبيمشي بصعوبة، والنهارده أهو زي ما إنت شايف
جاين شايلينه 🤔بس الشاب قدامك واعي وعارف إحنا فين ..
⬅️ هنا وقفت أفكر شوية:
يا ترى إيه ممكن اللي يعمل كده يا واد يا حوده؟ 😂💞
🔹️دماغي راحت لمرض من أخطر أمراض المخ والأعصاب
اللي بتأثر على الأعصاب الطرفية، عاوزك دكتور محترم ولماح، ولو عرفت التشخيص بدري وأخد العلاج أغلب الحالات
بيرجع طبيعي..
🔷كلامي النهارده عن ⬅️ متلازمة غيلان باريه ️
Guillain-Barré Syndrome (GBS)
تعالوا بقى نبدأ مع بعض
⛔️ إيه هو متلازمة غيلان باريه دي GBS؟
⬅️في أغلب الحالات الموضوع بيبدأ ب إنك
من حوالي اسبوع ل أربع أسابيع كان عندك دور برد، عدوى في الجهاز التنفسي، أو نزلة معوية إسهال وترجيع،
أو عدوى في المسالك البولية..
هتقولي:
⬅️ما كل ده عادي بيجي للناس كلها ومناعة جسمي بتحميني وتدافع عني وأبقى زي الفل، والعدوى خلاص خفيت منها.
💥 هنا بقى في المرض ده جهازك المناعي بيطلع أجسام مضادة، بدل ما كانت تطلع تمسك في الميكروب وتحميك، لا اتلغبطت وراحت هاجمت الأعصاب،
وهنا بدأت المشكلة: التنميل والضعف في رجلك ..
🔷️ يعني باختصار:
جالك عدوى ⬅️ نشطت جهازك المناعي ⬅️ طلعت أجسام مضادة ⬅️ راحت مسكت في الأعصاب الطرفية وعملت المشكلة
.................…
⛔️ بسبب اللي حصل ده المريض هيجي يشتكيلك من إيه أو أهله هيقولك إيه؟؟
1️⃣ تنميل أو شكشكة في القدمين.
2️⃣ إحساس بثقل، مش قادر أشيل رجلي.
🔷️ المميز إن المشكلة بتبدأ من تحت لفوق، يعني ياخد رجله الأول وبعدين يطلع على إيده وصدره.
(Ascending manner)
3️⃣ وبعدها الضعف ممكن يمتد للذراعين.
4️⃣ وأحيانًا عضلات الوجه تتأثر ويجيلك صعوبة في البلع والكلام.
5️⃣ والأخطر بقى واللي بترعب منه ويخلي الحالة تموت لو الضعف وصل لعضلات التنفس 🫁
كده الموضوع اتحول من مش قادر أمشي لـ مش قادر أتنفس، ودي حالة محتاجة رعاية مركزة وتتحط على جهاز تنفس صناعي.
🚨 علشان كده تبقى برنس وتتحسبلك فعلًا 💯
لو شخصت المرض ده بدري قبل ما تحصل المضاعفات، اللي أخطرهم فشل عضلة التنفس أو مشاكل البلع 💥
.............…
⛔️ طيب أشخصه إزاي؟
✅️ التشخيص في الأساسي إكلينيكي، مع حبايبنا دكاترة المخ والأعصاب، تحكيله بقى الموضوع بدأ إزاي وإيه اللي حصل زي ما قولنا فوق ⬆️، والدكتور بنفسه هيقوم يفحص الـ Neurological Examination كامل.
طبعًا هيلاقي مواصفات LMNL.
✅️ رسم الأعصاب والعضلات NCS/EMG
✅️ تحليل السائل النخاعي CSF
وغالبًا يظهر:
⬆️ ارتفاع البروتين مع
🔽 عدد خلايا طبيعي أو زيادة بسيطة
وده بنسميه Cyto-albuminic dissociation
...............…
⛔️ طيب العلاج إيه؟
طبعًا حالة زي دي والتدهور السريع اللي ممكن يحصل،
حالة حجز في مستشفى وممكن كمان رعاية لو النفس أو البلع اتأثر …
🎯 والعلاج الأساسي اللي بيوقف الهجوم المناعي:
1️⃣ IVIG
1️⃣الغلوبولين المناعي الوريدي.
أو
2️⃣ Plasma Exchange
2️⃣فصل البلازما.
ده أو ده على حسب المتوفر عندك.
⬅️ وطبعًا لازم نهتم بـ:
▪️ متابعة التنفس باستمرار.
▪️ متابعة ضربات القلب وضغط الدم.
▪️ اديله مسكن علشان الألم.
▪️ كل شوية يتحرك علشان ما يجلوش جلطات من قلة الحركة.
▪️ متابعة البلع والتغذية.
▪️ يعمل العلاج الطبيعي.
..................…
⛔️ أهم سؤال عارف عاوز تعرف إجابته: هل المريض بيخف؟
⬅️ معظم الحالات لو اتشخصوا واتعالجوا بدري بيرجعوا طبيعي جدًا، من الحالات اللي في المخ والأعصاب تحسسك إنك عملت حاجة، من واحد كان داخل مش قادر يمشي لواحد طالع ماشي على رجله.
⬅️بعض الحالات بيرجعوا بس المرض بيسيب شوية علامات ليه.
⬅️ وفيه حوالي 5% بيموتوا من فشل في عضلات التنفس.
........…
☢️المرض بيجي في كل الاعمار كبير وصغير عادي
☢️ اللي اتكلمت عنه ده النوع الشائع اللي بيجي بالاعراض اللي قولناها ، ممكن المرض يجي باشكال اخري..
..…
❤️ أنا كده خلصت، هو الموضوع طويل بس أكيد استفدت.
لايك وشير 💖 بااااي 👋
#اتعلم_الطب_مع_حوده 💖🧠
