ارتشاح العصب البصري (Papilledema
#معلومه_طبيه_رقم41
#مبحبش حد يتريق علي رسمتي 🥹 البوست مكنتش
هتتخليه وتفهمة من غير الرسمه دي فعملتها بنفسي 🔥
كان في مقوله دايما بنسمعها وهي ..…
⬅️ العين👀 مراياه المخ🧠
عمرك فكرت ايه معني الجمله دي ؟
تعالوا مع بعض النهارده نعرف / بما ان المخ عندنا حاجه مهمه علشان كدا موجود داخل الجمجمه ومقفول عليه كان لازم يكون عندنا حاجه ظاهره لينا تعبر عن اللي بيحدث فيه وهي العين.
⬅️حد منكم هيقول عرفت هتتكلم عن لغه العيون😂
يا عيوني مش هتبقي قناه طبيه نقفلها احسن😎
✔️اللي هيوضح لنا مقوله( العين مرايا المخ)
هو موضوعنا النهارده
🎯 ارتشاح العصب البصري (Papilledema)
✍️بسم الله نبدا .....
⛔️ يعني إيه ارتشاح العصب البصري؟
العصب البصري من اسمه هو المسؤول عن الابصار وطالع من العين ورايح للمخ ، احنا بنعتره جزء من المخ .
اي سبب يزود الضغط ، جوه المخ وطبعا المخ في الجمجمه ودي عضم مش هتكبر وتمدد ، الضغط الزياده ده هيلاقي مكان واحد بس يصرف فيه، هيروح ضاغط علي العصب البصري عن راسه داخل العين ويعمل تورم وارتشاح علي العصب.
يعني بسهوله كدا🤔
لما دكتور العيون يبص علي العصب يلاقيه مرشح يقول علطول ده معناه فيه ضغط زياده في ضغط المخ..
..............…
⛔️ دلوقتي لازم نعرف ايه الاسباب اللي تسبب زياده الضغط جوه المخ فتعملي ارتشاح العصب ؟
وبص علي الرسمه اللي انا رسمهالك بايدي متقولش فنان 🥳
1️⃣ أورام المخ: brain tumor
وجود ورم داخل الجمجمة بيشغل مساحة ويزود الضغط و يمنع تصريف السائل الدماغي ، فكل ده عمل زياده في ضغط المخ والجمجمه ثابته فيلاقي مكان واحد بس يصرف فيه فيروح ضاغط علي العصب البصري وعامل ارتشاح .
2️⃣ نزيف داخل المخ: Brain hemorrhage
النزيف سواء بسبب حادثه أو ارتفاع الضغط المفاجي عمل نزيف فزود الضغط داخل المخ فضغط ع العصب
3️⃣ الاستسقاء الدماغي Hydrocephalus :
ده غالبا هتشوفه في الاطفال اللي بيكونوا دماغهم كبيره
بيبقي عنده خلل في تصريف السائل المخي، فتزود الضغط داخل المخ فضغط ع العصب.
4️⃣ التهابات المخ والاعشيه السحائية
(Meningitis & Encephalitis )
اي التهاب بيعمل تورم فيزود الضغط داخل المخ فيضغط علي العصب .
5️⃣ جلطات أوردة المخ:
(Cavernous Venous thrombosis )
السائل الدماغي لما بيجي يصرف في الاورده فيلاقي فيها جلطه ومقفوله فيزود الضغط جوه المخ ف يتنقل للعصب
6️⃣ الورم الكاذب الحميد بالمخ ( ده سبب مهم)
(Idiopathic Intracranial Hypertension)
باختصار وبنقي نشرحه بالتفصيل فيما بعد
هو ارتفاع ضغط المخ بدون سبب واضح و بيجي اكثر في الستات ، وليه اسباب زي السمنه واضطراب في الهرمونات ،وادويه منع الحمل مع انه حميد بس لازم يتشخص بسرعه..
6️⃣ ارتفاع ضغط الدم( Hypertensive emergency )
يعني العيان لما يجيلي في الطواري بضغط عالي مثلا
فوق 200/120 انا اول حاجه بقولهاله
اطلع الرمد اعمل فحص قاع عين وانزلي
...........…
⛔️ ايه هي اعراض ارتشاح العصب البصري؟
طبعا كل سبب من اللي قولتهم ليه اعراضه الخاصه
بس كلهم بيعملوا ارتشاح فالمريض غالبا
✔️هيجي بضعف وتشويش في الرويه ،
✔️وزغلله ، ✔️وازدواج في الرويه ،
✔️وخلل في مجال الابصار ،✔️ وصداع
☢️في البداية ممكن النظر يكون طبيعي .
.......…
⛔️ درجات ارتشاح العصب البصري؟
تحت جهاز فحص قاع العين ليه اربع درجات
..........…
⛔️ التشخيص ؟ ايه الاشاعات والتحليل اللي نعملها علشان نشوف الارتشاح ونعرف السبب..
✅️فحص قاع العين(اول خطوه)
✅️ أشعة مقطعيه او رنين على المخ (ضرورية جدًا)
علشان استبعد الورم والنزيف والجلطات
وحاجه مهمه جدا اي دكتور يقولك هنعمل بذل نخاع للسائل الدماغي علشان نقلل الضغط شويه جوه المخ لازم الاول اعمل مقطعيه ..
✅️ قياس ضغط السائل النخاعي علشان اتاكد انه مرتفع
✅️ فحوصات اضافيه بقي زي مجال الابصار وحده النظر وغيرهم
.............…
⛔️ العلاج هيكون حسب السبب؟؟
⬅️زي مثلا لو السبب ورم علاجه جراحه + اشعاع او كيماوي
⬅️لو سبب التهاب الاغشيه السحائيه علاجه مضادات حيويه
☢️والعلاج ممكن في البدايه ابدا بادويه تقلل الارتشاح
او اعمل عمليه بذل للسائل النخاعي
☢️وممكن في الحالات المتقدمه لازم تدخل جراحه وتركيب وصله تقلل الضغط داخل المخ علشان الضغط علي العصب البصري لفتره طويله يودي الي ضمور العصب وفقد الرويه
....................…
🔴 الخلاصة
ارتشاح العصب البصري
مش مشكلة عين بسيطة⬅️ ده إنذار وتحذير بارتفاع الضغط داخل المخ ،فتشخيصه بدري انت بتنقذ حياه..
😎البوست طويل وصعب بس تقرأ البوست وتبص علي رسمتي هتستمتع اعتقد مفيش دلع بعد كدا 🥳
اكتبلي في التعليقات هل الرسمه كانت مفيده وفرقت في فهم الموضوع ولا عادي معملهاش تاني علشان وحشه 😂؟؟
لايك وشير 👍❤️ اتمني تكونوا استفدوا تعبت علشان
اوصله بالطريقه يارب يكون سهل ..
باااي 🤗👋
