في هذا المقال
#معلومه_طبيه_رقم52
✍️ بسم الله نبدأ…
🚨 هنتكلم النهارده عن أعراض نشاط وخمول الغدة الدرقية.
علشان تحفظ الأعراض بسهولة…
هقولها لك مرتين:
1️⃣ مرة على شكل قصة.
2️⃣ ومرة هكتبها تحت بعض علشان تحفظها.
خليك معايا... ⚠️
.......... الجزء الأول .......... 🦋
⛔️ إيه أعراض زيادة نشاط الغدة الدرقية؟
(Hyperthyroidism)
يعني الغدة بتنتج هرمونات أكثر من الطبيعي.
⛔️ هحكيلك قصة...
⬅️ جايلك ست عندها 35 سنة، شكوتها:
⬇️"باكل كتير وبخس الرد المعروف:
"زي القطط... بتاكلي وتنكري!"😂😂
لا يا دكتور... سيبني أكمل الأعراض.
⬅️وكمان بعرق كتير.
وبحس بحر ونار حتى لو الجو كويس وبارد.
⬅️ ضربات قلبي سريعة، و بدخل الحمام كتير... يعني إسهال.
طول اليوم بتعصب على عيالي وجوزي ، مش بعرف أنام.
⬅️ والدورة الشهرية مش منتظمة، وغالبًا بتنزل قليلة.
....…
⛔️ أنا كدكتور أول لما أسمع كده هفكر إزاي؟🤔
إيه الأعراض اللي ملهاش علاقة ببعضها دي؟
كل عضو في الجسم بيشتكي؟؟؟
💡 آه... ممكن يكون السبب مشكلة في الهرمونات.
✅️لأننا قولنا في البوست اللي فات إن الهرمون بيتفرز في الدم، وبعدها يروح يشتغل في أماكن كتير داخل الجسم.
وعلشان كده تنوع الأعراض ده بقى مفهوم.
.......…
⛔️ ليه قولت ست عندها 35 سنة؟
⬅️ اللي متابعني من الأول هيكون عارف…
أنا لما بختار سن معين أو أقول راجل أو ست، يبقى المرض منتشر أكتر في السن والجنس ده..
.........…
⛔️ تعال أقولك الأعراض تحت بعض علشان تحفظها:
🔥 فقدان الوزن رغم الأكل الجيد.
🔥 زيادة الشهية.
🔥 سرعة ضربات القلب.
🔥 رعشة في اليدين.
🔥 عصبية وتوتر.
🔥 تعرق شديد.
🔥 عدم تحمل الجو الحار.
🔥 أرق وصعوبة في النوم.
🔥 اسهال
🔥 اضطرابات الدورة الشهرية غالبا بتكون قليله
🔥 ممكن تلاقي الغدة الدرقية باينة في الرقبة وحجمها كبير.
📌 لأن الطبيعي إن الغدة الدرقية لا تكون ظاهرة، إلا إذا زاد حجمها.
👀 وفي بعض الحالات قد يحدث جحوظ بالعينين.
................…
💥 لو لاحظت…
كل الأعراض دي عبارة عن زيادة في نشاط الجسم.
علشان كده بنقول إن هرمون الغدة الدرقية لما يزيد،
بيولع الجسم كله.
✅️ على رأي الفنان مش عارف اسمه الصراحه.…
💥ولعها ولعها... شعللها شعللها..💥
.......... الجزء الثاني .......... ❄️
🚨 إيه أعراض خمول وقلة نشاط الغدة الدرقية؟
(Hypothyroidism)
يعني الغدة لا تنتج كمية كافية من الهرمونات.
⛔️ هحكيلك قصة... 🤔
⬅️ ست عندها 40 سنة جاية تقول:
“وزني بيزيد يا دكتور.”
😂 الرد المعروف:
“بتاكلي كتير... خفي شوية، هتنفجري!”
هترد عليك: والله يا دكتور... ما باكلش كتير.
⬅️وكمان عندي إحساس دائم بالبرد، وشي مورم ومنتفخ.
تحط ايدك علي جلدها تلاقيه ناشف ، علطول خمول وإرهاق.
⬅️ بحس إن تركيزي ضعيف ومش بلقط بسرعة.
😂 يعني باختصار... غبية، بس مش ذنبها. 🥹
⬅️ عندي إمساك.، شعري بيقع، وضربات قلبي بطئيه ..
⬅️ الدورة الشهرية ملخبطة، وغالبًا بتكون غزيرة.
..........…
⛔️أنا كدكتور برضو هقف محتار..🤔
إيه اللي جاب كل ده لبعض؟
وهفكر بنفس الأسلوب اللي فوق…
إن السبب ممكن يكون هرمون واحد مؤثر على الجسم كله.
...........…
⛔️ تعال أقولك الأعراض تحت بعض علشان تحفظها:
❄️ زيادة الوزن رغم إنها مش بتاكل كتير.
❄️ الإحساس المستمر بالبرد.
❄️ الخمول والإرهاق.
❄️ ضعف التركيز.
❄️ تورم الوجه والجفون.
❄️ الإمساك.
❄️ جفاف الجلد.
❄️ تساقط الشعر.
❄️ بطء ضربات القلب.
❄️ اضطراب الدورة الشهرية، وغالبًا بتكون غزيرة.
❄️ ممكن تلاقي الغدة الدرقية باينة في الرقبة وحجمها كبير.
..........…
⚠️ كفاية كده النهارده…
البوست ده لازم يتحفظ.
أنا بعيد وأزيد علشان لازم تطلع فاهم وحافظ.
غير كده... يبقى محتاج تتعالج. 🥹😂
⬅️انتظروا تكملة الغدة الدرقية في البوستات الجاية…
#اتعلم_الطب_مع_حوده💥💝
#السوال بص علي الصورتين اللي تحت ؟؟
انهي اعراض زياده نشاط الغده وانهي خمول الغده ؟؟؟
جاوب ف الكومنتات
النقاش
التعليقات (0)
فكرة تضيفها، أو سؤال يفتح حوارًا.
الرجاء تسجيل الدخول لتتمكن من التعليق