فقدان الاتزان Ataxia

#بوست_للعظماء_فقط 

🌹 أوعدك هتستمتع وكمل للاخر فيه لعبه هنلعبها مع بعض؟؟

. الموضوع مخ وأعصاب يعني الحب كله. ومتعوب عليه❤️

 يا حوده... أنا بحس وأنا ماشي إني هقع، وبمشي 

مش متزن وبطوح زي السكران! 💤

⬅️ دي شكوى بنسمعها كتير جدًا في العيادات والطوارئ…

🎤 نخلي بالنا... مش أي حد يبقى مش متزن وهو ماشي 

يبقى عنده دوخة.

🧠 ممكن يكون عنده حاجة اسمها Ataxia (فقدان الاتزان)، 

ودي من أهم الأعراض اللي لازم أي دكتور يكون عارفها.

🎯 فعلشان كده... النهارده هنتعلم مع بعض واحدة واحدة:

✅ يعني إيه فقدان الاتزان (Ataxia)؟

✅ وإزاي جسمنا بيحافظ على الاتزان؟

✅ إيه أشهر الأسباب اللي تخلي الجسم مش متزن؟

✅ وإزاي تفرق بين الأسباب دي باختبار واحد هنتعلمه مع بعض؟؟

 بسم الله نبدأ. ✍️

⛔️ يعني إيه فقدان الاتزان (Ataxia)؟

⬅️ هي عبارة عن عرض وليس مرض، بمعنى إن حركة الجسم بقت غير متناسقة.

فتلاقي المريض:

🚶🏻‍♂️ يمشي وهو بيطوح زي السكران.

🚶🏻‍♂️ مش عارف يحافظ على توازنه، وحاسس إنه هيقع.

................…

⛔️ إزاي جسمنا بيحافظ على الاتزان؟ 🤔

تخيل إنك علشان تقرر تقوم تقف وتمشي كويس من غير ما تقع…

🎤في 3 أجهزة في جسمك لازم يشتغلوا وينسقوا مع بعض، 

ويبعتوا إشارات للمخيخ 

وتقوله تمام،  دلوقتي تقدر تتحرك.

🧠 تخيل إن المخيخ عامل زي الكمبيوتر…

ولازم يوصلهم معلومات من 3 أجهزة استشعار قبل ما يقرر يدي أوامر للجسم إزاي يخليك واقف من غير ما تقع.

1️⃣ العين (Vision) 👀

العين بتحافظ على الاتزان إزاي؟

بتقول للمخ:

 أنت واقف فين؟ الأرض شكلها عامل إزاي؟

 المكان اللي حواليك آمن ولا لأ؟

━━━━━━━━━━

2️⃣ الأذن الداخلية (Vestibular System) 👂

⬅️ ودي تعتبر رمانة الميزان في الجسم.

بتعرف المخ:

 راسك ميلة ولا مستقيمة؟ جسمك بيتحرك ولا ثابت؟

 أنت بتلف ولا ماشي في خط مستقيم؟

━━━━━━━━━━

3️⃣ الإحساس العميق (Proprioception) 🦵

وده إحساس موجود في:

✔️ العضلات.✔️ المفاصل.✔️ الأربطة.

وبيوصل للمخ مكان رجلك وإيدك موجودين فين…

حتى لو قافل عينك.

🧠 وبعد كده.....…

كل المعلومات دي تروح للمخيخ (Cerebellum)…

وهو يعمل لها معالجة وتربيط مع بعض، ويطلع أوامر للعضلات والجسم علشان يحافظ على الاتزان.

🎯 يبقى أي مشكلة في:

 العين. الأذن الداخلية.الإحساس العميق. أو المخيخ.

⬅️ هتعمل فقدان اتزان (Ataxia).

........................…

⛔️ إيه أشهر الأسباب اللي تخلي الجسم مش متزن؟

1️⃣ المشكلة في المخيخ نفسه

(Cerebellar Ataxia)

المريض هيدخل عليك شكله عامل إزاي؟

☑️ ماشي ورجليه بعيدة عن بعض، خايف يقع.

☑️ بيتمايل ويطوح يمين وشمال زي السكران.

📌 ومعلومة ليك:

لو بيطوح ناحية اليمين... غالبًا المشكلة في المخيخ اليمين.

☑️ عنده رعشة أثناء الحركة (Intention Tremor).

☑️ كلامه ممكن يبقى متقطع واندفاعي،

 واسمها Staccato Speech.

🎤 وخلي بالك…

الأعراض دي موجودة سواء عينه مفتوحة أو مقفولة.

دي  معلومة مهمة... هنحتاجها بعد شوية. ⬇️

.............…

2️⃣ المشكلة في الإحساس العميق

(Sensory Ataxia)

⬅️ المريض بيعتمد على عينه علشان يعرف مكان رجله.

علشان كده…

👀 أول ما يقفل عينه.، ، تلاقيه يفقد اتزانه فورًا.

🚸ودي بنشوفها أكتر في الناس اللي عندهم التهاب

 في الأعصاب الطرفية، خصوصًا مرضى السكر.

تلاقيه يقولك:

أنا مش حاسس الأرض تحت مني... 

وحاسس إني واقف على قطن."

فتلاقيه وهو ماشي…

👀 باصص على الأرض طول الوقت، وخايف يقع.

ولو غمض عينه، يبدأ يطوح وهيقع.

...................…

3️⃣ المشكلة في الأذن الداخلية

(Vestibular Ataxia)

وغالبًا بيكون معاها:

 ⬅️إحساس إن الدنيا بتلف.،  غثيان.، ترجيع.

⬅️طنين في الأذن.، وضعف في السمع أحيانًا.

⬅️ومعاه  احيانا حركه لا اراديه في العين Nystagmus 

......................…

⛔️ تعال مع بعض نعمل اختبار رومبيرج للاتزان

Romberg Test

و بص على الصورة اللي تحت ⬇️

⚠️ يلا نجرب الاختبار ده على نفسنا…

كل واحد يقوم 

✅ يقف وسيب اللي ف ايدك 

✅ خلي رجليك لازقين في بعض.

⬅️ أول مرة اعمله وإنت فاتح عينك.

⬅️ تاني مرة اعمله وإنت مغمض عينك.

 بس استنى يا معلم.،اعمل الاختبار وإنت واقف جنب السرير…

علشان لو وقعت متتعورش.🥹😂

☢️ إيه النتيجة اللي هتحصل؟

🚸 النتيجة الأولى

لو فضل المريض ثابت وهو فاتح عينه…

ولما قفلها بدأ يقع أو يتمايل بشدة…

✅ يبقى كده اختبار رومبيرج إيجابي (Romberg Positive).

⬅️ وده معناه إن المخ كان بيعتمد على العين 

علشان يحافظ على الاتزان…

ولما قفلنا العين... ظهر العيب وبدأ يقع.

وقتها تبقى المشكلة هنا:

2️⃣ في الإحساس العميق (Proprioception) 

→ Sensory Ataxia.

3️⃣ في الأذن الداخلية → Vestibular Ataxia.

━━━━━━━━━━

🚸 النتيجة الثانية

لو المريض أصلًا مش قادر يقف ثابت وهو فاتح عينه…

وبرضه لما قفلها..، مش ثابت وهيقع.

❌ يبقى كده اختبار رومبيرج سلبي (Romberg Negative).

⬅️ والمشكلة هنا في المخيخ نفسه.

🧠 Cerebellar Ataxia.

🎤 أنا عارف إن الموضوع صعب جدًا…

بس والله حاولت أبسطه بأسهل طريقة ممكنة.

🥰 وكله يقوم يعمل الاختبار على نفسه…

لعبة أهي... مش مخلي نفسك في حاجة. 😂❤️

⬅️ أي حد هيقرأ البوست هيستفيد.سواء كان 

في المجال الطبي أو غير طبي.

بااااي 👋

#اتعلم_الطب_مع_حوده